Pola
importáncia no resultado final, a gelificaçom merece todo um
capítulo aparte.
A
saponificaçom é umha reacçom química que produz calor. Se
conservamos o calor que se produz durante a saponificaçom, o sabom
adquire um estado gelatinoso e translucido, que é o que conhecemos
como gelificaçom. A gelificaçom produz-se a uns 50 grados e pode
durar um dia aproximadamente, começando desde o centro, onde a
temperatura é maior. Quando fazemos o sabom em quente, aceleramos o
processo por médio de umha fonte de calor externa, para conseguir
que se produza a gelificaçom completa e assim aceleramos o processo
de curado, já que garantimos que a saponificaçom se complete.
Na
elaboraçom em frio do sabom também pode produzir-se a gelificaçom.
Especialmente se a quantidade de sabom e grande, a gelificaçom pode
ter lugar no próprio molde onde continua a saponificaçom, logo de
moldar o nosso sabom. O próprio calor do processo, se o molde é o
suficiente isolante, gelifica o sabom. Neste caso, devemos ter conta
de cubrir o sabom com materiais que conservem o calor (recomenda-se
recubrir com film e logo toalhas ou mantas). O risco que corremos
nestes casos é que a gelificaçom nom seja completa, afecte só ao
centro do sabom, o que pode provocar variaçoes na textura e na cor
indesejadas.
Ante
isto temos duas opçoes. Se queremos que o sabom gelifique, umha vez
no molde, podemos isola-lo correctamente, e se com isto nom podemos
garantir que vaia conservar o seu calor, mete-lo no forno,
quentando-o a uns 50 grados e apagando-o depois. Umha opçom mui
cómoda para quem tenhades cocinha de ferro é mete-lo no forno com a
porta entre-aberta.
A
outra opçom é a de evitar a gelificaçom. As vezes isto prefere-se
porque os resultados na textura do sabom som um bocado distintos,
ficando o sabom com um tacto mais suave e fino, e também porque a
gelificaçom pode provocar a apariçom de pequenas borbulhas no
interior do sabom. Outras vezes motivara-nos o usso de algum
ingrediente que nom leve bem as altas temperaturas do processo.
Simplesmente
evitamos que gelifique refrigerando o sabom logo de molda-lo. Se é
inverno quiçá seja suficiente com evitar isola-lo, coloca-lo perto
da janela,.. Com alguns aceites e aditivos, no que o sabom tenda mais
a gelificaçom, podemos mesmo recurrir a mete-lo no refrigerador.
A
eleiçom sobre se o sabom gelifique ou nom é finalmente nossa, mas
compre adiantar-nos aos acontecimentos. Se utilizamos um molde
pequeno ou pouco isolante, podemos correr o risco de que nom
gelifique por completo, polo que é melhor evitar a gelificaçom
refrigerando o sabom, ou bem recorrer ao forno para completa-la. Os
sabons que gelificam tem um tempo de curado muito menor, nom soem
produzir a anti-estética cinça, que as vezes afecta a umha parte
importante do sabom, e obtenhem-se cores mais vistosas e homogéneas.
Também o tempo em contacto dos ingredientes com os altos pH da soda
é menor, mas também a temperatura é maior. Compre eleger segundo
as nossas preferências e experiência.