Como preparar extracto de Gilbarbeira (Ruscus aculeatus) para usso externo e cosmético: olheiras, manchas,..

em

Chega o tempo de apanhar a gilbarbeira, o rasca-cú, o açouta-cristos. Com estes nomes tam descritivos conhecemos na Galiza ao Ruscus aculeatus, umha erva com usos milenários, conhecida polas suas propriedades diuréticas, depurativas,.. mas sobre todo, polas suas propriedades sobre o sistema circulatório. Recomendada para quem padecem de varizes, hemorroides, pernas hinchadas,.. e demais problemas relacionados com umha má circulaçom periférica. É reconhecido como o vegetal com mais acçom venotónica.


Mas neste artigo vou fazer referência às preparações para usos cosméticos da gilbarbeira, já que tem múltiplas aplicações, e este é um médio polo que, para as mais receosas, resulta mais fácil e motivador utilizar ervas medicinais. A gilbarbeira pode utilizar-se em cosméticos para a pele e o cabelo. Olheiras, capilares e manchas da pele,.. e muitos outros problemas, como o próprio envelhecimento prematuro, procedem ou podem estar associados a problemas circulatórios. O mesmo sucede no cabelo, com picores, caspa, etc.

A gilbarbeira apanha-se a finais do inverno ou começos da primavera, e aproveita-se a raiz e o rizoma. Compre levar umha sachinha ou algum utensílio para cavar na terra, e umhas boas tesouras de podar ou umha navalha, para poder tirar o potente rizoma da planta de baixo da terra. Também é aconselhável aguardar a um dia depois da chuva, para topar a terra branda, e apanha-lo na lua minguante ou nova.

Compre lavar bem o rizoma e as múltiplas raízes que o acompanham, mudando a auga muitas vezes e esfregando suavemente nalgum caso. Logo podemos seca-lo, para o que compre pica-lo em porçoes miudas, pois a sua consistência e lenhosa, e coloca-lo num lugar quente, ventilado e seco. Também o podemos utilizar fresco, sobre todo se o imos infundir.

Umha elaboraçom útil para uso cosmético som os extractos HG ou HAG, nos que o solvente que dilui as propriedades medicinais da erva som a auga e a glicerina (HG) ou a auga, a glicerina e o álcool (HAG). Como a glicerina nom é tam agresiva com a pele como o alcool, quiçá prefiramos o primeiro tipo de extracçom para cremes faciais, contornos de olhos, etc, e o segundo para champôs, cremes medicinais, geles para pernas cansas, etc.

Como os imos utilizar por via externa, podemos fazer extractos em proporçom 1:3, quer dizer, 1 parte de droga (erva) por três de solvente, mas poderiamos utilizar soluçoes maiores, por exemplo 1:5. E importante que o solvente cubra a erva, para o que a picaremos finamente ou reduziremos a pó num moinho. Por exemplo, um extracto HAG 1:3, seria;
20 g de raiz e rizoma seco de gilbarbeira.
20 g de auga.
20 g de álcool de 70 ou 96.
20 g de glicerina vegetal.

E um extracto HG 1:3
20 g de raiz e rizoma seco de gilbarbeira.
30 g de auga.
30 g de glicerina vegetal.

A maceraçom tem que durar um mínimo de 15 dias, remexendo diariamente. Ao finalizar, coamos a mistura com um filtro de papel, engarrafamos e etiquetamos.

Se nom elaboramos os nossos próprios cosméticos, podemos utilizar os extractos diluídos em infusons para o aclarado, em auga como tónicos faciais, engadidos numhas pingas ao nosso champô ou creme, etc. Umhas quantidades orientativas podem ser um 3-5% numha creme facial ou um 10% num champô.

O extracto HG de Gilbarbeira é um dos produtos que utilizo na elaboraçom do champô cremoso de ervas medicinais, junto com outros extractos elaborados de jeito similar, o de castinheiro das bruxas (Aesculum hippocastanum) e o de capuchinha, na foto.















 Por último, para a gilbarbeira mas também para qualquer outra erva, apanhemos com respeito, sem esquilmar. A gilbarbeira medra a partir de um rizoma, polo que ajudamo-la a regenerar-se se levamos parte do rizoma e deixamos outra na terra. Apanhemos o que imos utilizar, pouco a pouco: as primeiras vezes que imos apanhar umha erva tendemos a levar grandes quantidades que logo nom chegamos a utilizar nunca, ou que nom somos capazes de gestionar, especialmente em casos como este em que o secado é um pouco complicado.